მსოფლიოს სასკოლო გუნდური ჩემპიონატი
ქართველი მოსწავლეები მსოფლიოს სასკოლო გუნდური ჩემპიონატის ევროპის ეტაპის ბრინჯაოს მედალოსნები გახდნენ!
სომხეთის ქალაქ წაღკაძორში დასრულებულ მსოფლიოს სასკოლო გუნდური ჩემპიონატის ევროპის კონტინენტურ ეტაპზე დიდი წარმატებით იასპარეზა ქუთაისის ანდრია რაზმაძის სახელობის №41 ფიზიკა-მათემატიკური სკოლის გუნდმა ინგა კიკვიძის კაპიტნობით.
ქართველმა მოზარდებმა ტურნირი მესამე ადგილზე დაასრულეს და ბრინჯაოს მედლები დაისაკუთრეს.
შეჯიბრება შვეიცარიული სისტემით, 8 ტურად გაიმართა და მასში ევროპის 27 ქვეყნის წარმომადგენლები მონაწილეობდნენ. საქართველოს გუნდმა 8 ტურში 11 ქულა დააგროვა.
პირველი ადგილი მინსკის (ბელარუსი) №50 გიმნაზიის გუნდმა დაიკავა – 14 ქულით.
მეორე ადგილზე რიგის (ლატვია) №1 გიმნაზიის გუნდი გავიდა.
განსაკუთრებით მნიშვნელოვანი აღმოჩნდა მერვე, გადამწყვეტი ტური, რომელშიც ქუთაისელმა მოსწავლეებმა დაძაბულ ბრძოლაში ერევნის №77 საბაზისო სკოლის გუნდი დაამარცხეს და საბოლოოდ ბრინჯაოს მედლები მოიპოვეს.
ვულოცავთ ქართველ მოსწავლეებს, მათ მწვრთნელებს, სკოლას და გულშემატკივრებს ამ მნიშვნელოვან წარმატებას!
მსოფლიოს სასკოლო გუნდური ჩემპიონატი 2026
World Schools Team Championship (WSTC) FIDE-ისა და International School Chess Federation-ის (ISCF) ერთობლივი პროექტია და 2026 წელს ახალი ფორმატით ტარდება.
ჩემპიონატი ოთხ კონტინენტურ ეტაპს მოიცავს – აფრიკაში, ამერიკაში, აზიასა და ევროპაში. თითოეული კონტინენტური ჩემპიონატის გამარჯვებული გუნდი პირდაპირ მოიპოვებს Grand Final-ის საგზურს. ფინალური ეტაპი დეკემბერში გაიმართება და ოთხი კონტინენტის გამარჯვებულ გუნდებს გააერთიანებს.
2026 წლის ციკლი აზიის კონტინენტური ეტაპით დაიწყო, რომელიც აპრილის დასაწყისში ყაზახეთის ქალაქ ალმათიში გაიმართა.
2026 წელი- „ჭადრაკი განათლებაში“
მსოფლიოს სასკოლო გუნდური ჩემპიონატი – „ჭადრაკი განათლებაში 2026“ პროგრამის ერთ-ერთი მთავარი პროექტია.
ინიციატივა მიზნად ისახავს სკოლებში ჭადრაკის როლის გაძლიერებას და მისი საგანმანათლებლო შესაძლებლობების გამოყენებას ბავშვების კოგნიტური და სოციალური უნარების განვითარებისთვის.
მსოფლიოს სასკოლო გუნდური ჩემპიონატი პირველად 2023 წელს ყაზახეთში ჩატარდა, ხოლო 2025 წლის გათამაშებას აშშ-მ უმასპინძლა.
FIDE-ისა და ISCF-ის თანამშრომლობის ფარგლებში 2026 წელს საერთაშორისო სასკოლო გუნდური ტურნირების სერია იმართება, რომლის ერთ-ერთი მთავარი ღონისძიებაც სწორედ მსოფლიოს სასკოლო გუნდური ჩემპიონატია.