მწვრთნელთა მეორე ეროვნული ფორუმი
13 – 15 დეკემბერს ბათუმში გაიმართა მწვრთნელთა რიგით მეორე ეროვნული ფორუმი.
ფორუმი ოფიციალურად გახსნა და მონაწილეებს სიტყვით მიმართა საქართველოს ჭადრაკის ფედერაციის პრეზიდენტმა, აკაკი იაშვილმა. თავის გამოსვლაში მან განსაკუთრებული ყურადღება გაამახვილა ერთიანი სასწავლო მეთოდიკის მნიშვნელობაზე და აღნიშნა, რომ სისტემური, სტანდარტიზებული მიდგომა არის ქართული ჭადრაკის მდგრადი განვითარებისა და საერთაშორისო კონკურენტუნარიანობის ერთ-ერთი მთავარი წინაპირობა.
ფორუმის ფარგლებში, ფედერაციის მიერ დანერგილი ინოვაციური საგანმანათლებლო პროგრამის ‘საფეხურები’ განხილვას დაეთმო მნიშვნელოვანი დრო. პროგრამის მთავარმა მენტორმა, ნატალია ეძგვერაძემ, ვრცლად გააანალიზა ‘საფეხურების’ I, II და III ტომები, წარმოაჩინა მეთოდიკის ძირითადი პრინციპები და ხაზი გაუსვა მის პრაქტიკულ მნიშვნელობას ბავშვთა ჭადრაკის სწავლების პროცესში.
აჭარის ჭადრაკის ფედერაციის პრეზიდენტმა, სალომე მელიამ, ისაუბრა რეგიონში პროგრამა ‘საფეხურების’ დანერგვის პროცესზე, არსებულ სირთულეებსა და მიღწეულ შედეგებზე, რაც განსაკუთრებით მნიშვნელოვანია რეგიონული გამოცდილების გაზიარების კუთხით.
ფორუმის დისკუსიურ ნაწილში აქტიურად ჩაერთნენ საქართველოს სხვადასხვა რეგიონის წარმომადგენლები, რომლებმაც საკუთარი ხედვები და პრაქტიკული გამოცდილება გაუზიარეს დამსწრე საზოგადოებას და აღნიშნეს ახალი საგანმანათლებლო პროგრამის როლი ადგილობრივ დონეზე ბავშვთა ჭადრაკის განვითარებაში.
საკუთარი მოსაზრებები გამოთქვეს:
• ალექსი ტერ-კარაპეტიანმა (ბათუმი)
• ზურაბ ანდღულაძემ (ოზურგეთი)
• ნინო ხარაულმა (გორი)
• ადა ქაქუთიამ (ფოთი)
• საბა ალალიძემ (ზესტაფონი)
ფორუმი ემსახურება საქართველოში მოქმედი მწვრთნელებისთვის ერთიანი პროფესიული სივრცის შექმნას, სადაც ცოდნის, გამოცდილებისა და თანამედროვე საგანმანათლებლო მიდგომების გაზიარება ხელს შეუწყობს ქართული ჭადრაკის სისტემურ განვითარებას.
ფორუმის მეორე დღეს დიდი ინტერესი გამოიწვია ფიდეს სენიორ ტრენერისა და მსოფლიო ჭადრაკში წამყვანი მწვრთნელის, სერგეი ტივიაკოვის (ნიდერლანდები) ლექციამ.
მან დამსწრე საზოგადოებას გაუზიარა საკუთარი გამოცდილება მსოფლიო ტოპ-მოჭადრაკეებთან მუშაობის პროცესიდან და ყურადღება გაამახვილა იმ საჭადრაკო მეთოდოლოგიებზე, რომლებიც თანამედროვე მწვრთნელისთვის აუცილებელია.
განსაკუთრებული ყურადღება დაეთმო ფედერაციის მიერ განხორციელებული ‘ნიჭიერთა სკოლის’ მწვრთნელების, პროგრამა ‘საფეხურების’ მენტორების: დიანა დარჩიასა და ხვიჩა ბახტაძის გამოსვლას.
აღსანიშნავია, რომ ახალი მეთოდოლოგიით მუშაობა მათ 5-6 წლის ბავშვებთან დაიწყეს და უკვე მიაღწიეს შესამჩნევ შედეგებს, მათი აღსაზრდელები საქართველოს ჩემპიონატების გამარჯვებულები და პრიზიორები არიან.
ფორუმში მონაწილეობა მიიღო საქართველოს ყველა რეგიონიდან მოწვეულმა 130-მდე წარმომადგენელმა, რაც მნიშვნელოვანი ნაბიჯია ქვეყანაში მწვრთნელთა პროფესიული განვითარების, თანამშრომლობისა და ბავშვთა ჭადრაკის სისტემური განვითარების მიმართულებით.
საქართველოს ჭადრაკის ფედერაცია აგრძელებს აქტიურ მუშაობას განათლების ხარისხის ამაღლებისა და მწვრთნელთა მხარდაჭერისთვის.