ევროპის ქალთა ინდივიდუალური ჩემპიონატი ბათუმში იმართება!
26-ე ევროპის ქალთა ინდივიდუალური ჩემპიონატი ბათუმში, 2026 წლის 24 მაისიდან 6 ივნისის ჩათვლით გაიმართება.
ჩემპიონატი 11 ტურად, შვეიცარიული სისტემით ჩატარდება.
დროის კონტროლი: 90 წუთი 40 სვლაზე, დამატებით 30 წუთი პარტიის დასრულებამდე და თითოეულ სვლაზე 30-წამიანი დამატება პირველივე სვლიდანვე.
ტურნირი FIDE-ის ქალთა მსოფლიო ჩემპიონატის ციკლის ნაწილია და მონაწილეებს შესაძლებლობას აძლევს მოიპოვონ საგზური ქალთა მსოფლიო თასზე. ევროპის საჭადრაკო კავშირის გადაწყვეტილებით, მინიმუმ 10 მოჭადრაკე მიიღებს კვალიფიკაციას.
ჩემპიონატის საპრიზო ფონდი 60 000 ევროს შეადგენს, საიდანაც გამარჯვებული 10 000 ევროს მიიღებს.
შეჯიბრში ევროპის 32 ქვეყნის 170-მდე მოჭადრაკე მიიღებს მონაწილეობას, მათ შორის 30 ქართველი მოჭადრაკე საქართველოს სახელით იასპარეზებს.